საქართველოს რაგბის კავშირმა საქართველო-რუსეთის მატჩი უკრაინულ ენაზე დაწერილი პოსტერით დააანონსა ფეისბუკსა და ტვიტერზე, თუმცა რამდენიმე საათში პოსტები ორივე სოციალური ქსელიდან წაიშალა.
კონტექსტი
ევროპის ჩემპიონატის ფარგლებში რუსეთისა და საქართველოს სარაგბო ნაკრებებს შორის მატჩი 27 თებერვალს, 18:00 საათზეა დაგეგმილი.
უკრაინის მხარდასაჭერად რუსეთის მიერ ქვეყანაში ხელახალი შეჭრის რისკისა და ლუგანსკისა და დონეცკის რეგიონების დამოუკიდებლობის აღიარების ფონზე, ქართველ გულშემატკივართა ნაწილი, – მათ შორის პოლიტიკური პარტიები (მაგ. „ევროპული საქართველო“), – გეგმავს, მატჩს უკრაინის დროშებით დაესწროს.
რაგბის კავშირის გადაწყვეტილება, რომ მატჩის პოსტერები უკრაინულად გამოექვეყნებინა, ასევე აღიქმებოდა, როგორც უკრაინის მხარდაჭერის ჟესტი.
თუმცა დღისით გამოქვეყნებული პოსტერები გვიან საღამოს განმარტების გარეშე წაიშალა.
რა არის მიზეზი?
საქართველოს რაგბის კავშირს ჯერჯერობით ოფიციალური განმარტება ამ ფაქტზე არ გაუკეთებია. „ნეტგაზეთი“ რაგბის კავშირის პრესცენტრს დაუკავშირდა და ელოდება მათგან განმარტებას.
რუსული გამოცემა SPORT24.RU ჯერ კიდევ გუშინ, საღამოს 8-ის ნახევრისთვის იუწყებოდა რუსეთის რაგბის ფედერაციაზე დაყრდნობით, რომ ქართულ მხარეს ამ პოსტების წაშლის მოთხოვნით ევროპის რაგბის ფედერაციამ მიმართა.
რუსეთის რაგბის ფედერაციის პრესსპიკერი, ანტონ ხალიზოვი ამბობდა:
„[რუსეთის რაგბის] ფედერაციამ მიმართა Rugby Europe-ს ამ ვითარებასთან დაკავშირებით. ჩვენ დაგვიდასტურეს, რომ ასეთი პუბლიკაციები დაუშვებელია და ეს რეგლამენტის დარღვევაა. ევროპის ფედერაციამ მიმართა ქართულ მხარეს, აეღოთ ეს აფიშა“.
წინააღმდეგ შემთხვევაში, მისი თქმით, ქართულ მხარეს ჯარიმა დაეკისრებოდა.
რუსეთის ფედერაციამ 21 თებერვალს დამოუკიდებლად ცნო დონეცკის და ლუგანსკის დე ფაქტო რესპუბლიკები.
პუტინის გადაწყვეტილების პასუხად უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინას არავისი და არაფრის არ ეშინია.
ამ ნაბიჯის პასუხად შტატებმა, ევროკავშირმა, იაპონიამ და სხვა ქვეყნებმა სანქციები დააწესეს.
