შეერთებული შტატების საელჩო აცხადებს, რომ ცესკოს წევრის დანიშვნის წესის მორიგი ცვლილება „ძირს უთხრის“ პარტიების შეთანხმებას, რომ ეს პოზიციები მრავალპარტიული კონსენსუსით შეივსოს.
„პარლამენტის ნაჩქარევი გადაწყვეტილება ცენტრალური საარჩევნო კომისიის წევრების დანიშვნის წესის ბოლოდროინდელი რეფორმების გაუქმებაზე, ძირს უთხრის მმართველი პარტიისა და ოპოზიციის შეთანხმებულ ძალისხმევას, რომ ეს კრიტიკულად მნიშვნელოვანი პოზიციები მრავალპარტიული კონსენსუსის საფუძველზე შეივსოს“, – აცხადებს საელჩო.
საელჩოს შეფასებით, ეს არის
„კიდევ ერთი არასაჭირო ნაბიჯი, დაშორებული იმ ვალდებულებებისგან, რომელიც მმართველმა პარტიამ მოქალაქეებისა და საერთაშორისო საზოგადოების წინაშე აიღო, ოდირის დიდი ხნის არსებული რეკომენდაციების შესრულებით, ოპოზიციურ პარტიებთან და სამოქალაქო საზოგადოებასთან თანამშრომლობით საქართველოს საარჩევნო სისტემისა და დემოკრატიული ინსტიტუტების გაძლიერებისთვის“.
საელჩოს თანახმად, იმისათვის რომ საქართველოს ამომრჩევლებს ჰქონდეთ ნდობა საარჩევნო პროცესის მიმართ, ისინი უნდა ენდობოდნენ ცენტრალური საარჩრევნო კომისიის წევრების მიუკერძოებლობას, დამოუკიდებლობასა და კვალიფიკაციას.
„სწორედ ამას ისახავდა მიზნად წინა, კონსენსუსზე დაფუძნებული პროცედურა,რომელზეც მმართველი პარტია და ოპოზიცია შეთანხმდა, სანამ ეს წესი პროცესის ბოლოს შეიცვალა ინკლუზიური კონსულტაციის გარეშე“, – აცხადებს საელჩო.
„ჩვენ მოვუწოდებთ ყველა პარტიას პარლამენტში, სამოქალაქო საზოგადოებას, პრეზიდენტსა და მის გუნდს ერთობლივი მუშაობისკენ ყველაზე მაღალკვალიფიციურ, დამოუკიდებელ და მიუკერძოებელ კანდიდატებზე მრავალპარტიული კონსენსუსის მისაღწევად ცენტრალური საარჩევნო კომისიის იმ პოზიციების დასაკავებლად, რომლებიც თებერვალში გახდება ვაკანტური“, – აცხადებს საელჩო.
ცესკოს თავმჯდომარისა და წევრების არჩევის ახალ წესში, რომელიც 19 აპრილის მიიღეს ე.წ. შარლ მიშელის შეთანხმების საფუძველზე, ისევ ცვლილებები შევიდა.
რეგლამენტის ცვლილებები, რომელიც პარლამენტმა დაჩქარებული წესით განიხილა, ცესკოს წევრების ასარჩევი პროცედურის ვადისა და კენჭისყრების რაოდენობის შემცირებას ითვალისწინებს.
ვრცლად:
